ማእኸላይ ኮሚቴ ውድብና ህዝባዊ ወያነ ሓርነት ትግራይ ንዝሓለፉ ኣርባዕተ መዓልታት ከካይዶ ዝፀንሐ ስሩዕ ኣኼብኡ ኣብ ዝሓዞም ኣጀንዳታት ብዕምቆት ዘትዩ ቀፀልቲ ኣንፈታት ብምቕማጥ ዛዚሙ፡፡
ማእኸላይ ኮሚቴ ውድብና ህወሓት ኣብ ህልው ኩነታት ትግራይን ከባቢናን ፣ ኣፈፃፅማ መደባት ዝሓለፉ ሰለስተ ኣዋርሕን ኣንፈታት ቀፀልቲ መደባትን መሰረት ጌሩ ብዕምቆት ዘትዩ ኣሎ፡፡
ማእኸላይ ኮሚቴ ውድብና ኣብ ጉዳይ ተመዛበልቲን ዝተሰደዱ ወገናትናን፣ ምውሓስ ሉእላዊ መሬትና፣ ሰናይ ምምሕዳር፣ ክረምታዊ መደባትን መደባት ውሸጢ ውድብን ብዝርዝር ዝዘተየ ኮይኑ ኣብ ትሕቲ ወረርቲ ዝሳቐ ዘሎ ህዝብና ሓራ ክወፅእን ተመዛበልቲ ወገናትና ውሕስነኦም ተሓልዩ ብመሰረት ስምምዕ ፕሪቶርያ ኣብ ዝሓፀረ እዋን ክምለሱን ዘኽእል ሰላማዊ ፖለቲካዊ ቃልሲ ክግበር፣ ኣብዚ ዘመነ ምህርቲ 2017-2018 ዓ/ም ንዓርሰ ምርኮሳ ማእኸል ኣብ ዝገብረ ዕማማት ክረምታዊ ሰራሕቲ ርብርብ ክካየድን ሰላምን ፀጥታን ህዝብና ንምውሓስን ሰናይ ምምሕዳር ንምስፋንን ዘኽእሉ መደባት ክፍፀሙን ኣንፈታት ኣቐሚጡ ኣሎ፡፡
ማእኸላይ ኮሚቴ ውድብና ህወሓት ኣብ መሰርሕ ቃልሲ ውድብ ብዝተፈላለየ መንገዲ ዝመፁ ፖለቲካዊ ኣፈላላያት ብምይይጥ እናኣለየን ኣብ ከይዲ ንዝተነጠባጠቡ ህንፀት እናካየደን ዓቕምታቱ ክእከብ፣ ዝተፈለየ ኣረኣእያ ሒዞም ካብ ውድብና ዝወፁ ኣካላት ዘለዎም ኣፈላላይ ብሰላማዊ ፖለቲካዊ ቃልሲ ከስጉሙ ከምዝግባእ ብምዝታይ ዝህሉ ፖለቲካዊ ኣፈላላይ ከምዘለዎ ኮይኑ ኣብ ሓበራዊ ብሄራዊ ኣጀንዳታት ትግራይ ሓቢርካ ንምስራሕ ዘኽእል ኣንፈት ኣቐሚጡ ኣሎ፡፡
ማእኸላይ ኮሚቴ ውድብና ህወሓት ሓድነት ህዝብና ንምዝራግ ብከባብያውነትን ካልኦት ድሑራት ኣራኣእያታትን ዝንባለታትን ዝግበሩ ዘለዉ ምንቅስቓሳት ብኣግባቡ ብምቅላስ ሓድነትን ህዝብናን ኣመራርሓን ንምስጥጣም ዝሕግዙ መደባትን ኣነፂሩ ኣሎ። ብተወሳኺ ትካላት ትግራይ ተልእኾአን ብኣግባቡ ከይፍፅማ ዝተሓላለኸ ሽርሒን ጥቕዓትን እናበፅሐን ከምዝርከብ ብምርዳእ ትካላዊ ዋንነት እዘን ትካላት ትግራይ ዘረጋግፅ መትከላዊን ህዝባዊን ቃልሲ ክካየድ ኣንፈት ተቐሚጡ ኣሎ።
ማእኸላይ ኮሚቴ ውድብና ምስ መንግስቲ ኢትዮጵያ ይኹን ካልኦት ዝግበሩ ርክባት ዝምልከቱ ጉዳያት ዘትዩ ኩሎም ርክባት ስምምዕ ፕሪቶርያ ማእኸል ዝገበሩን ኩሉ ጉዳያት ብሰላምን ዘተን ክፍታሕ ቀፃሊ ፃዕርን ቃልስን ክካየድ ከምዘለዎ ኣንፈት ኣቐሚጡ እዩ።
ውድብና ህወሓት ንዝሓለፉ ሓምሳ ዓመታት በቢእዋኑ መድረኻዊ ተልእኽኡ ንምፍፃም ዘኽእሎ ውሽጣዊ ምምዕርራያት እናገበረ ዝመፀ ኮይኑ ኣብዚ ሕዚ እዋን ምስ ዝምዕብል ዘሎ ኩነታት፤ ውድብና መድረኽ ዝጠልቦ ብቕዓት ወኒኑ ቃልሲ ህዝቢ ትግራይ ንምምራሕ ዘኽአሎ ምምዕርራይ ንምግባር ሙሁራትን ነባራት ዓቕምታትን ብምትእኽኻብ ክስራሕ ዝፀንሐ ሪፎርም ውሽጢ ወድብ ዝበፅሐሉ ብርኪ ዝቐረበሉ ማእኸላይ ኮሚቴ ውድብና ኣብቲ ዝተዳለወ ቀዳማይ ረቂቕ ሪፎርም ካብ መሪሕነት ወድብና ጀሚሩ በቢብርኩ ዝርከቡ ኣመራርሓናን ኣባላትናን ከምኡ እውን ምልኣተ ህዝብናን ዝተፈላለዩ ክፋላት ማሕበረሰብን ሓሳብ ክህብሉን ክዓሙቕን ኣንፈት ኣቐሚጡ ኣሎ፡፡
ኣብ መወዳእታ ህዝብና ዘልዕሎም ሕቶታት ንምምላስ ዘኽእል ርብርብ ክካየድን ዕማማት ግዝያዊ ምምሕዳር ንምዕዋት ተዋዲድካ ንምስራሕ ዘኽእሉ ኣንፈታት ብምቕማጥን ስሩዕ ኣኼብኡ ዛዚሙ ኣሎ፡፡
