ሰሙናዊ መግለፂ ህዝባዊ ወያነ ሓርነት ትግራይ
ህወሓት ንመላእ ህዝቢ ትግራይ ብፍላይ ድማ ንደቂ ኣንስትዮ ትግራይ እንኳዕ ነታ ካብ ዓመት ንዓመት ተሃንጢኽን እተብዕለኣ ኣሸንዳ ኣብፀሐክን እንትብል ዝለዓለ ፍናንን ክብርን ይስመዖ። ኣሸንዳ ብቕብብል ወሎዶታት ሃይማኖታውን ባህላውን ትውፊቱ ዓቂቡ ሓደ መግለፂ ህዝቢ ትግራይ ኮይኑ እናተባዕለ ዝመፀን ዝቕፅልን ዘሎ በዓል እዩ። ውድብና ህወሓት ካብ ዝተቓለሰሎምን ይቃለሰሎም ዘሎን ዕላማታት ሓደ ህዝቢ ትግራይ እምነቱን ባህሉን ብነፃነት ከንፀባርቕ ምኽኣል እዩ።
ኣምር ነፃነት ደቂ ኣንስትዮ ዝኾነት በዓል ኣሸንዳ እንትነብዕል እውን ደቂ ኣንስትዮ ትግራይ ንብሄራዊ ህልውነአንን መዓርነተንን ዘካየድኦን የካይድኦ ዘለዋን ድርብ ቃልሲ ብምዝካርን ዝለዓለ ክብሪ ብምሃብን እዩ።
በዓል ኣሸንዳ እዚ ዓመት ካብ መረበቱ ብሓይሊ ዝተፈናቐለ ህዝብና ናብ መረበቱ ኣብ ዘይተመለሰሉ፣ ኣብ ትሕቲ ወረርቲ ዝነብር ህዝብና ሓራ ኣብ ዘይወፀሉ፣ ኣብ ልዕሊ ደቂ ኣንስትዮ ዝበፅሐ ፆታዊ ዓመፅ ሓዊሱ ኣብ ልዕሊ ህዝቢ ትግራይ ኩሉ መልክዕ ጀኖሳይድ ኣብ ዝፈፀሙ ተሓታትነት ኣብ ዘይተረጋገፀሉ ኩነታት ኮይና ኢና ነብዕሎ ዘለና። ህዝቢ ትግራይ ሕዚ እውን ሓደጋ ህልውና ኣብ ዘንፀላለወሉ ኩነታት ነቲ ዝለዓለ ዓቕሚ ህዝቢ ትግራይ ዝኾነ ሓድነት ብምሽርሻር ኣቢልካ ህዝቢ ትግራይ ንምስኳን ብዝተዋደደ መልክዑ ርብርብ ኣብ ዝካየደሉ ዘሎ እዋን እውን ኢና ንርከብ።
ደቂ ኣንስትዮ ትግራይ በዓል ኣሸንዳ እዚ ዓመት እንትተኽብራ ነዞም እትቃለሳሎም ዘለኽን ዕላማታት ዝሽርሽሩ ኣረኣእያታት ብምቅላስ ህዝቢ ትግራይ ሓድነቱ ኣስጢሙ ዘንፀላለዎ ሓደጋ ህልውና በዲሁ ንምውፃእን ሕቶታቱ ግቡእ ምላሽ ክረኽቡን ኣብ ዝግበር ቃልሲ ከም ቀደምክን እጃምክን ከምእተበርክታ ውድብክን ህወሓት ይተኣማመን።
ደጊምና ሰናይ በዓል ኣሸንዳ ክኾነልክን ንመነ፡፡
ብሄራዊ ሓድነት ንምኽባር ሉእላውነት
ዘለኣለማዊ ዝኽርን ክብርን ንስውኣትና!
ህዝባዊ ወያነ ሓርነት ትግራይ
