ሰሙናዊ መልእኽቲ ህወሓት
ስምምዕ ፕሪቶርያ ካብ ዝፍረም ሳልሳይ ዓመቱ ይደፍን ኣሎ። እቲ ስምምዕ ኩለመዳያዊ መልክዓት ሞትን ስቓይን ህዝብና ንኸብቅዕ ዝተበፅሐ እኳ እንተኾነ ብሰንኪ መንግስቲ ኢትዮጵያ ነቲ ሰምምዕ ንምትግባር ዘኽእል ተበግሶ ዘይምህላዉ ሞትን ስቓይን ህዝብና ክገትእ ኣይከኣለን። ወረርቲ ሓይልታት ኣብ ዝሓዝዎ ሉእላዊ መሬት ትግራይ ዝነብር ህዝብና መንነቱ ገበን ኮይኑ መርሸንቲ፣ ጭውያ፣ፆታዊ መጥቃዕትን ብሓይሊ ምፍንቓልን ይፍፀሞ ኣሎ። እቲ ንዝሓለፉ ዓመታት ናብ መረበቱ ክምለስ ብዓቕሊ ክፅበ ዝፀንሐ ኣብ ማእኻላት መዕቖቢ ዝርከብ ህዝብና ሓምሻይ ክረምቲ ኣርኪብዎ ብሕማምን ጥሜትን ይሃልቕ ኣሎ።
ኣብዚ ሰሙን እዚ ብተኸታታሊ ዝዘንብ ዘሎ ዝናብ ስዒቡ ኣብ ማእኸላት መዕቖቢ ዝርከብ ህዝብና ንሓሙሽተ ዓመት ኣብ ዘገልገለ ቅዳድ ኬንዳ ዝናብ ኣብ ርእሱ ይፅሒ ኣሎ። ማእኸላት መዕቖቢ ብውሕጅ ኣዕለቕሊቐን ህዝብና ኣብ ልዕሊ ጥሜቱን ሕማሙን መውደቒ ጎኑ ስኢኑ ኣብ ሓደጋ ወዲቑ ኣሎ። መንግስቲ ኢትዮጵያ ነዚ ህዝብና ወዲቕዎ ዘሎ ሓደጋ ተረዲኡ ስምምዕ ፕሪቶርያ ብምትግባር ግቡኡ ኣብ ክንዲ ምውፃእ ብሞትን ስቓይን ህዝብና ፖለተካዊ ከስቢ ንምርካብ ኣብ ምድንጋር ይርከብ።
ህዝብና ናብ መረበቱ ክምለስ ዝግባእ ውሕስንኡ ብዝተሓለወ መንገዲ እዩ። ኣብ ቀረባ ናብ መረበቶም ኣብ ዝተመለሱ ነበርቲ ወረዳ ፀለምቲ ኮነ ኣብ መላእ ምዕራብ ትግራይ ዝነብር ህዝብና ብዕጡቓት ኣብ ዝቕተለሉ፣ ዝጭወየሉን ንተመዛበልትና ናብ ካሊእ ሓደጋ እተዉ ምባል ብፀገም ህዝብና ምሽክዕላልን ምብጫውን እዩ። መንግስቲ ኢትዮጵያ ከለላ ክህብ እየ ኢሉ ዝመለሶ ህዝቢ ፀለምቲ ካብ ካልኦት ዕጡቓት ክከላኸል ይትረፍ ባዕሉ እውን ተሳታፊ ከምዝኾነ ኣብ ዝሓለፈ ሰሙን ብሰራዊት መንግስቲ ኢትዮጵያ ኣብ ከተማ ማይፀብሪ ዝተፈፀመ ቅትለት ናይ ቀረባ መርኣያ እዩ፡፡ ስለዚ መንግስቲ ፌደራል ተመዛበለትና ውሕስንኦም ተሓልዩ ክምለሱ ንስምምዕ ፕሪቶርያ ተገዛኢ ብምዃን ዘዕጥቘምን ዘዋፍሮምን ዘሎ ዕጡቓትን፤ ኣባይቲ ህዝብና ወሪሮም ዝሓዙ ሰፈርቲን ካብ ሉእላዊ መሬት ትግራይ ከውፆም ይግባእ፡፡
ኣደራደርቲ ስምምዕ ፕሪቶርያ መንግስቲ ኣሜሪካን ሕብረት ኣውሮፓን፣ ሕብረት ኣፍሪካ ብሓፈሻ ድማ ማሕበረሰብ ዓለም ነዚ ብሰንኪ መንግስቲ ኢትዮጵያ ንስምምዕ ፕሪቶርያ ዘይምትግባሩ ዝፍጠር ዘሎ ሓደጋ ብምርዳእ ኣብ ልዕሊ መንግስቲ ኢትዮጵያ ፅዕንቶ ክገብሩን ህፁፅ መፍትሒ ንምምፃእ ዘኽእል ጭቡጥ ምንቅስቓስ ክፍፅሙን ይግባእ።
ብፍላይ ድማ ንኣፈፃፅማ ስምምዕ ፕሪቶርያ ዝግምግም ፓነል ሕብረት ኣፍሪካ ሕዚ እውን ውድብና ህወሓትን ህዝቢ ትግራይን ንዘቕርብዎ ዘለዉ ተደጋጋሚ ፃውዒት ህፁፅ ምላሽ ብምሃብ ከይዲ ኣፈፃፅማ እቲ ስምምዕ ክግምግም ይግባእ።
ብሄራዊ ሓድነት ንምኽባር ሉእላውንት!
ዘለኣለማዊ ዝኽርን መጎስን ንስውኣት!
