ፍትሓዊ ሕቶ ህዝቢ ትግራይ ብመፈራርሒ ኲናት ምዕፋን ኣይከኣልን!
ህዝቢ ትግራይ ኮነ መሪሕ ውድቡ ህዝባዊ ወያነ ሓርነት ትግራይ ኩሎም ኣፈላላያት ብሰለማዊ ፖለቲካዊ ቃልሲ ክፍትሑ ከምዘለዎም ናይ ትማሊ ኮነ ናይ ሎሚ ዘይንቕነቕ ቅዋሞም እዩ። ሰለማዊ ልዝብ ኮነ ሽምግልና ካብቶም መበቆላዊ ትውፊታት ህዝቢ ትግራይ እዮም። ንዘጋጥሙ ኣፈላላያት ብሰለማዊ ዘተ ንምፍታሕ ዝግበር ዝኾነ ይኹን ተበግሶ በሪ ህዝቢ ትግራይ ኮነ መሪሕ ውድቡ ህዝባዊ ወያነ ሓርነት ትግራይ ርሕው እዩ፡፡ ኣካል እዚ ቅዋም ህዝቢ ትግራይን መሪሕ ውድቡ ህወሓትን ድማ ኣብቲ ዝሓለፈ ሰሙን ላዕለዎት ኣመራርሓ ውድብና ንልኡኽ ጉጀለ ጉባኤ ሃይማኖታት ኢትዮጵያ ተቐቢሎም ኣዘራሪቦም እዮም።
ልኡኽ ጉጅለ ጉባኤ ሃይማኖታት ኢትዮጵያ፤ ነቲ ቐዳማይ ሚኒስተር ኢትዮጵያ ኣብ ፓርላማ ዘስምዕዎ ዘረባ መሰረት ብምግባር ዳግም ናብ ጎንፂ ዘእትዉ ጉዳያት ንምፍታሕን ስግኣት ጎንፂ ንምትራፍን ሃቂኑ ፃውዒት ሰላም ሒዙ ከምዝመፀ ብምግላፅ ምስ ዝተፈላለዩ ኣካላት ትግራይ ዘትዩ እዩ፡፡ ላዕለዎት ኣመራርሓ ውድብና ነቲ ጉጅለ ዘዘራረቡ ኮይኖም ህዝቢ ትግራይ ኩሉ ዓይነት በደላት እናተፈፀሞ እውን እንተኾነ ምእንተ ሰላም ኢሉ መስዋእቲ ኣብ ምኽፋል ዝርከብ ህዝቢ ምዃኑ፤ ንሰላም ልዕሊ ህዝቢ ትግራይ ዝብህጎን ዋጋ ዝኸፍለሉ ዘሎን ከምዘየለ ብምግላፅ ነቲ ዝወሰድዎ ተበግሶ ንኢዶም እዮም። ኣባላት እቲ ልኡኽ ጉጅለ እውን እቲ ብወገን ትግራይ ዘሎ ናይ ሰላም ድሌትን ቅሩብነትን ምስቲ ዝሰምዕዎን ኣብ ባይታ ዝረኸብዎን ኣዝዩ ዝተፈላለየ ምዃኑ ብምግላፅ ኣብ ናይ ሰላም ቅዋምኩም ፀኒዕኹም ተፀበዩና ዝብል መልእኽቲ ኣሕሊፎም እዮም።
ኩሉ ደላዪ ሰላም ክፈልጦ ዝግባእ እምበኣር እቲ ብወገን ትግራይ ንሰላም ኢልካ ዝግበር ዘሎ ትዕግስቲ እዩ። ህዝቢ ትግራይ ንኲናት ኣማራፂ ስኢኑ ተገዲዱ ዝኣትዎ እምበር ብሂጉ ዝኣትዎ ኣማራፂ ኣይኮነን። 40 ሚኢታዊ መሬት ትግራይ ተወሪሩ ብመንንቱ እናተቐተለን እናተሳቐየን፣ ኣብ ስደትን ማእኸላት መዕቖብን ሓምሻይ ክረምቲ ኣርኪብዎ ዝናብ ኣብ ልዕሊኡ እናፀሓየ ምእንተ ሰላም ሕዚ እውን ዋጋ ይኸፍል ኣሎ፡፡ መንግስቲ ኢትዮጵያ ኣብ ክንዲ ዝኣተዎ ውዕል ብምፍፃም ኣብ ልዕሊ ትግራይ ዝፍፀም ዘሎ በደል ከብቅዕ ዝሰርሕ ብወገን ትግራይ ንጎንፂ ዝዕድም ዝኾነ ይኹን ምንቅስቓስ ኣብ ዘየለሉ ኣጀንዳ ንምቕያር ኣብ ወፍሪ ምፍርራሕ ተፀሚዱ ይርከብ።
መንግስቲ ኢትዮጵያ ካብ ምፍርራሕ ሓሊፉ እውን ትግራይ ንምህዋኽ ዕጡቓት ብምውዳብን ብምዕጣቕን ኣብ ልዕሊ ህዝቢ ትግራይ ተወሳኺ በደል ይፍፅም ኣሎ፡፡ እቲ ኣብ ዝሓለፉ ዓመታት ከም ሓደ ሜላ ጀኖሳይድ ዝተጠቐመሉ ዕፅዋን ክባን ዳግም ብምትግባር ነዳዲ ናብ ትግራይ ከይኣቱ ካብ ምግባሩ ብተወሳኺ ነተን ካብ ውራን ዕንወትን ዝተረፋ ተሽከርከርቲ ትካላት ትግራይ ክሳብ ምጭዋይ ዝበፅሕ በደላት ይፍፀም ኣሎ፡፡ ኣብ ክንዲ ውዕል ፕሪቶርያ ብምትግባር ህዝብና ውሕስንኡ ተሓልዩ ናብ መረበቱ ክምለስ ግብኡ ምፍፃም ብዘይውሕስና ናብ መረበቱ መንንቱ ቀይሩ ክኣቱ ይኽእል እዩ እናበለ ኣብ ምብጫው ይርከብ፡፡ ቅድም ኢሎም ብዘይውሑስ መንገዲ ናብ ፀለምቲ ዝተመለሱ ወገናትና ዝበፅሖም ዘሎ ሓሳረ መከራ ነዚ ናይ ባጫ ኣሽካዕላል መንግስቲ ኢትዮጵያ ህያው ምስክር እዮም፡፡ ህዝብና መንነቱ ቀይሩ ዘይኮነስ መረበቱ ወሪሮም ዝሓዙ ዕጡቓት፣ ኣባይቱ ዝወረሱ ሰፈርቲን ምምሕዳራት ኣምሓራን ወፅዮም ድሕንነቱ ብዘረጋግፅ መልክዑ እዩ ናብ መረበቱ ክምለስ ዝግባእ፡፡
ስለዚ መንግስቲ ኢትዮጵያ ካብዚ ኣብ ልዕሊ ህዝቢ ትግራይ ዝፍፅሞ ዘሎ ተደራራቢ በደልን ዝፈጥሮ ዘሎ ካሊእ ደበና ኲናትን ተቖጢቡ ህዝቢ ትግራይ ኮነ መሪሕ ውድቡ ህወሓት ንዘቕርቦ ዘሎ ተደጋጋሚ ፃውዒት ሰሚዑ ወረርቲ ሓይልታትን ሰፈርትን ብቕልጡፍ ካብ መሬት ትግራይ ብምውፃእ ዝተሰደደን ዝተመዛበለን ህዝብና ውሕስንኡ ተሓልዩ ናብ መረበቱ ክምለስ ግቡኡ ክዋፃእ ይግባእ፡፡ እዚ ክሳብ ዘይተፈፀመ ህዝቢ ትግራይ ኮነ ህወሓት ንሃለዋቱን ሉእላዊ መሬቱን ዝገብሮ ሰለማዊ ፖለቲካዊ ቃልሲ ካብ ዝኾነ ይኹን እዋን ኣጠናኺሩ ክቕፅል እዩ፡፡ ፍትሓዊ ሕቶ ህዝቢ ትግራይ ብመፈራርሒ ኲናት ምዕፋን ኣይከኣልን!
ብሄራዊ ሓድነት ንምኽባር ሉእላውነት!
ዘለኣለማዊ ክብርን መጎስን ንስውኣትና!
ህዝባዊ ወያነ ሓርነት ትግራይ
