ብዝተፈላለየ ምድላዋት ክፅንበል ዝቐነየ ፌስቲቫል ተጋሩ ነበርቲ ሰሜን ኣሜሪካ ፅባሕ ብዝለዓለ ድምቀት ክዛዘም እዩ።
ኣብ ዝሓለፈ ሰኑይ ብስሩዕ ዝተኸፈተ ፌስቲቫል ተጋሩ ሰሜን ኣሜሪካ ብሰሉስን ሮብዕን ኣብ ህልው ኩነታት ትግራይ ኣመልኪቱ ዘተ ዝተኻየደ ኮይኑ ተሳተፍቲ ኣብ ጎኒ ህዝቢ ትግራይ ኮይኖም ከም ወትሩ ብሓድነት ከምዝቃለሱ ገሊፆም።
ብሓሙስ ድማ ንምጥንኻር ማሕበር ልምዓት ትግራይ መሰረት ዝገበረ መድረኽ ዘተ ዝተሳለጠ ኮይኑ እታ ማሕበር ንምድጋፍ ከምዝረባረቡ ቃል ኣትዮም።
ተሳተፍቲ ፌስቲቫል ተጋሩ ሰሜን ኣሜሪካ ትማሊ ዓርቢ ስምምዕ ፕሪቶርያ ክትግበርን ኣብ ልዕሊ ህዝቢ ትግራይ ዝቐፀለ ሰላሕታዊ ጀኖሳይድ ከብቅዕን ዝሓትት ሰልፊ ዘካየዱ ኮይኖም ንምሸቱ ድማ መናእሰይ ተጋሩ ባህልን ህልው ኩነታት ዓዶምን ክፈልጡ ዝሕግዝ ፌስቲቫል መናእሰይ ኣካይዶም።
ፌስቲቫል ተጋሩ ሰሜን ኣሜሪካ ሎሚ እውን ቀፂሉ ዝተፈላለዩ ዕዱማት ኣጋይሽ ኣብ ዝተረኸብሉ ህዝባዊ ዋዕላ ዝካየድ ዘሎ ኮይኑ ድሕሪ እቲ ዋዕላ ክካየድ ንዝቐነየ ስፓርታዊ ውድድር ብምጥቕላል ኣብ መወዳእታ ዕላዊ መዛዘሚ መድረኽ እቲ ፌስቲቫል ክሳለጥ እዩ።
ኣብ መዛዘሚ መድረኽ ፌስቲቫል ተጋሩ ሰሜን ኣሜሪካ ካብ ውሽጢ ዓዲ ሓዊሱ ዝተፈላለዩ ኣካላት መልእኽቲ ከመሓላልፉ እዮም።
