ላዕለዎት ኣመራርሓ ውድብና ዓበይቲ ዓዲ፣ መራሕቲ ሃይማኖት፣ ነጋዶን፣ ኣባገዳታትን ተቐቢሎም ኣዘራሪቦም

ላዕለዎት ኣመራርሓ ውድብና ካብ ኩለን ክልላትን ምምሕዳር ከተማታትን ዝተውፃእፅኡ ዓበይቲ ዓዲ፣ መራሕቲ ሃይማኖት፣ ነጋዶን ኣባገዳታትን ተቐቢሎም ኣዘራሪቦም።

እቶም ዓበይቲ ዓዲ፣ መራሕቲ ሃይማኖት፣ ነጋዶን ኣባገዳታትን፤ ኩናት ጠጠው ይበል፣ ሰላም ይኹን ዝርርብ ይጀመር ዝብል መበገሲ ውጥን ብምድላው ናብ ምንቅስቓስ ከምዝኣተዉ ብምግላፅ ከካብ ክልሉ ዝመፁ ተወከልቲ ፃውዒት ሰላም ኣቕሪቦም።

ኣብቲ ዝርርብ ዝተረኸበ ኣቦ ወንበር ውድብና ህወሓት ብፃይ ዶ/ር ደብረፅዮን ገብረሚካኤል ነቶም ሽማግለታት እንኳዕ ደሓን መፃኹም ምስ በለ ከም ትግራይ ኩሉ ግዘ ንሰላም ቅሩባት ምዃና ደጋጊምና ገሊፅና ኢና ሕዚ እውን ንሳላም ኢና ንሰርሕ ዘለና ኢሉ።

ቅድሚ ጀኖሳይዳዊ ኲናት 2013 ዓ/ም እውን ተመሳሳሊ መድረኽ ተኻይዱ ከም ዝነበረ ዘዘኻኸረ ብፃይ ዶ/ር ደብረፅዮን እቲ ሕዚ ተጀሚሩ ዘሎ ምንቅስቓስ ሓቀኛ ድሌት ሰላም ዝሓዘ ክኾን ከምዘግባእ ብምሕባር ንሕና ንደልዮ ሓቀኛ ሰላም ስለዝኾነ ሓቀኛ ሰላም ኢና ንፅበ ኢሉ፡፡

ካብ ህዝቢ ትግራይ ንላዕሊ ሰላም ዝደሊ የለን ዝበለ ብፃይ ዶ/ር ደብረፅዮን ብዙሕ በደል ዝበፅሖ ካብ ጫፍ ናብ ጫፍ ትግራይ ዝርከብ ህዝብና ፍትሒ ክረክብ ይግባእ ኢሉ።

ሕዚ ቁፅሪ ሓደ ኣጀንዳና ዝተመዛበሉ ወገናትና ውሕስንኦም ተሓልዩ ናብ መረበቶም ምምላስ ምዃኑ ብምግላፅ ኲናት ጠጠው ካብ ዝብል ሰለስተ ዓመት ምቕፃሩ በምዝኽኻር ሓቀኛ ድሌት ሰላም እንተዝህሉ እንተነኣሰ እዞም ተመዛበልቲ ናብ መርበቶም ክምለሱ ምግባር ይከኣል ኔሩ ኢሉ።
መሬት ትግራይ ዛጊድ ተወሪሩ ከምዘሎ ብምግላፅ መሬትና ብሰላም ክምለስ ኢና ንፅበ ዝለና ዝበለ ዶ/ር ደብረፅዮን ህዝብና ናብ መረበቱ ክምለስ እጃምኩም ክትዋፅኡ ይግባእ ኢሉ።

ህዝብና ፣ ህወሓት ይኹን ሰራዊትና ድሌቱ ሰላም ምዃኑ ብምግላፅ ዝበፃሕናዮ ስምምዕ ፕሪቶርያ ስለዘሎ ካሊእ ስምምዕ ከየድለየ ብመሰረት እቲ ስምምዕ ዘይተፈፀሙ ውዕላት ክፍፀሙ እጃምኩም ክትዋፅኡ ይግባእ ኢሉ፡፡

ሕብረት ኣፍሪካ ኣኼባ ክፅውዕ ተደጋጋሚ ሕቶ ኣቕሪብና ኢና ዝበለ ዶ/ር ደብረፀዮን ገብረሚካኤል መድረኽ ተዳልዩ ክንዘራረብ እዩ ድሌትና ኢሉ፡፡

ብናትና ናይ ሰላም ድሌት ክትትኣማመኑ ይግባእ ምስ በለ ንእትገብርዎ ናይ ሰላም ምንቅስቓስ ብኣና ወገን ምሉእ ድጋፍ ከም ንህበኩም ከነረጋግፀልኩም ይፈቱ ኢሉ፡፡

ምክትል ኣቦ ወንበር ወድብና ህወሓት ብፃይ ኣማኒኤል ኣሰፋ ብወገኑ ኣብ ዝሓለፈ ሓሙሽተ ዓመታት ኣብ ልዕሊ ህዝቢ ትግራይ መእለያ ዘይብሉ በደል ክምዘተፈፀመ ብምግላፅ ኣብዚ ሕዚ እዋን መሬት ትግራይ ተወሪሩ ሚልዮናት ተፈናቒሎም ፣ ህዝቢ ትግራይ ፓለቲካዊ ውዳበታቱን ትካላት ኢኮኖሚን ክስእን፣ ሰብ ሃፍቲ ኣብ ልዕሊ ዕዳ ዕዳ ክፀዓኑ ይግበር ከምዘሎን ሕሉፍ ሓሊፉ ኣብዚ ሕዚ እዋን ህዝቢ ትግራይ ባዕሉ ንባዕሉ ንምግጫው ኣብ ዓፋር መናእሰይ ትግራይ ክስልጥኑ ይግበር ኣሎ ኢሉ፡፡

ልኣላውነትና ኣይተኸበረን፣ ተመዛበልቲ ኣይተመለሱን፣ ተፀጊምና ንግፋዕ ኣለና፣ ትግራዋይ ይብደል ኣሎ፣ ብሰለማዊ መንገዲ ፀገማት ንፍታሕ ምባልና እዩ ኲናት ዝበሃል ዘሎ ዝበለ ብፃይ ኣማኒኤል ከም ህወሓት ፣ ሰራዊት ትግራይ ኮነ ግዝያዊ ምምሕዳር ሕዚ እውን ድሌቶም ሰላም ምዃኑ ከነረጋግፀልኩም ይደሊ ኢሎም።

ሰላም ብተግባር ክስነ ከምዝግባእ ብምግላፅ ናብቲ ዝተጀመረ ከይዲ ሰላም ስምምዕ ፕሪቶርያ እንተተመሊስና ኩሎም ፀገማት ብሰለማዊ መንገዲ ንምፍታሕ ዘኽእል ቁመና ክፍጠር እዩ ዝበለ ብፃይ ኣማኒኤል ናብቲ ስምምዕ ክንምለስ ፃዕሪ ክትገብሩ ይግባእ፡፡

ሓላፊት ቤት ፅሕፈት ውድብና ህወሓት ብፂት ፈትለወርቅ ገብረእግዚኣቢሄር፤ ብወገና እንኳዕ ደሓን መፃኹም ምስ በለት ልዕሊ ህዝቢ ትግራይ ሰላም ዝግበኦን ስላም ዝደልን የለን ኢላ።

ንሕና ሰላም እንብል ካብ ልብና እዩ ዝበለት ብፂት ፈትለወርቅ ሰላም ብዘላቕነት ክህሉ ዝኽእል ፍትሒ እንትረጋገፅ ስለዝኾነ ፍትሒ ክረጋገፅ ከምዝግባእ ብምሕባር ፍትሒ ምሕታት ድማ ኲናት ምድላይ ማለት ኣይኮነን ኢላ፡፡

ሕቶ ህዝቢ ትግራይ ስምምዕ ፕሪቶርያ ክትግበር ዝተመዛበለ ህዝብና ናብ መረበቱ ክምለስ እዩ ዝበለት ብፂት ፈትለወርቅ ተመዛበልቲ ወገናትና ብመሰረት ስምምዕ ፕሪቶርያ ክምለሱ እናተገበኦም ዛጊድ ከይተመለሱ ሓምሻይ ክረምቲ ኣርኪብዎም ኣብ ቅዳድ ኬንዳ ይነብሩ ኣለው ኢላ።

መናእሰይ ትግራይ ኩናት ኣይግበኦምን፣ ድሌት ህዝቢ ትግራይ ሰላም እዩ ዝበለት ብፂት ፈትለወርቅ ብወገን ትግራይ ተቐራሪብካ ብምዝርራብ ካብ ዝበፅሐና ዕንወት ክንሓዊ፣ መሰረተ ልምዓት ዳግም ክህነፁ፣ ጉድኣት ዝበፅሖም ስድራን ኣካሎም ዝጎደሉ ወገናትናን ክድገፉ ዘኽእል ሰላም ክህሉ ኢና ንሰርሕ ዘለና ኢላ።

ኣብ መወዳእታ እቶም ልኡኻት ብወገን ትግራይ ዘሎ ድሌትን ቅሩብነትን ሰላም ብግልፂ ቋንቋ ከምዝተነገሮምን ከምዝተረድኡን ብምግላፅ ኣብ ቀፃሊ መድረኽ ብምፍጣር ዝርርብ ክህሉ ክንሰርሕ ኢና ኡሎም፡፡